كتب : عباس العشاري
في البدء رسالتنا لك
يا ود البلد، يا بت البلد.
مبروك الجواز الجديد. مبروك الجنسية اللي تعبت عشانها، ووقفت صفوف، وملّيت ورق، وسهرت ليالي من حقك تفرح. من حقك تأمّن مستقبلك ومستقبل أولادك. لكن خليني أقيف معاك وقفة صدق عشان
خلاص استلمت جواز اجني بقيت خواجة وتنكر اصلك وتنكر بلدك الجواز ورقة، لكن الأصل دم الجواز الأمريكي، الكندي، البريطاني، الأسترالي… دي كلها إجراءات حكومة. بتديك حقوق، بتسهل سفرك، بتفتح لك شغل. لكن ما بتغير دمك. ما بتغير اصلك
أنت بقيت مواطن في بلد تاني بالقانون. لكنك سوداني بالتربية. بالمواقف. بالكرم اللي أبوك رباك عليه. بالشهامة البتخليك تقيف مع المظلوم حتى لو ما بتعرفو.
الشئ المؤسف في عدد من السودانيين أول ما مسكوا الجواز الأجنبي نسوا يتكلموا عربي مع أولادهم. والمضحك جدا البعض بقى يخجل يقول أنا من السودان عشان الحرب والكلام الفارغ في الإعلام.
أنت سفير، ما منفي. الجواز الأجنبي ما معناه هروب. معناه فرصة. فرصة توري العالم يعني شنو “سوداني”. يعني شنو زول صادق في شغله. يعني شنو بنت محترمة ومثقفة. يعني شنو زول وقت الأزمة بيلم شمله ويساعد.لو كل سوداني طلع و أنكر أصله، منو البيرفع اسم السودان؟ لو كلنا بقينا “خواجات” بالكلام، منو البيرجع يبني البلد لما الحرب تقيف؟افرح بالجواز وخليه سند لك ولأولادك. دا حقك.ما تتنكر لأهلك،للغتك، لعاداتك السمحة. ما تتكبر علي بلدك. التعرف على السودان كله من تصرفك أنت السوداني ياسوداني.
لو افترضنا إنو عدد من السودانيين نالو جوازات أجنبية، فالموضوع ما بكون ترفع بالمعنى الحقيقي. في النهايةالجواز الأجنبي ممكن يفتح باب سفر وأمان مؤقت، لكن ما بيمسح الهوية ولا الوجع ولا المسؤولية تجاه الأهل والبلد.و الحرب والتشرد والخوف.. مفروض السودان يكون جواك حتى لو كنت في أبعد دولة.خلي قولك يكون بشعار
“الجسم طلع، لكن القلب لسه في السودان”
حصل سألت نفسك ليه؟ منحوك جواز سفر
ما عشان تطلع كل يوم لايف تتكلم بطريقة، وأسلوب لا يليق بسمعة السودانيبن.
ما عشان تتصور وتتفاخر وتقلل من أصلك قدام العالم كله.الأمانةالسودانية .والأدب والاحترام ..والشهامة
دي البضاعة الرابحة حقتنا. خلت الناس برا تحترم اسم السودان
